Центр культуры «Аан-Аартык»

Аан-Аартык сынньалан киинигэр бэҕэһээ ахсынньы 5 күнүгэр тыа хаһаайыстыбатын эҥсилэ суох үлэлии-хамсыы сылдьар, тыа хаһаайыстыбатынан дьарыгырар «Киһини-үлэ киэргэтэр» диэн тыа хаһаайыстыбатын хоһуун үлэһиттэригэр анаан биэчэр тэрийдибит. Киэһээ биэс чаастан атыы- тутуу выставка -дьаарбанка буолла. Үөрэнээччилэр фри хортуоппуйу буһаран атыылаатылар, олохтоох дьон, 2 Малдьаҕар орто оскуола бэйэтин продукциятын аҕалан улахан выставка буолла, ол кэннэ нэһилиэк аҕа баһылыга Олег Валериевич Иринеев нэһилиэк тыатын хаһаайыстыбатын сиһилии кэпсээтэ, сүөһү иитиитигэр сыратын уурбут, үрүҥ илгэни үрүйэлии сүүрдээччи, хороҕор муостааҕы хойуннараачы Трофимова Валентина Ильичнаҕа нэһилиэк бочуоттаах олохтооҕо анал аат туттарыллынна уонна 14 киһиэхэ махтал сурук туттарда, ол кэннэ Хаҥалас улууһун тыа хаһаайыстыбатын департаменын салайааччыта Вячеслав Ильич Владимиров эҕэрдэ тыл уонна грамота туттартаан үлэһит дьоммутун үөртэ. Бөртө сылгы иитэр генеральнай директора Александр Васильевич Павлов тыа хаһаайыстыбатын күнүнэн истиҥник барыларын эҕэрдэлээн, юбилейдаах дьонун үрдүк сыанаҕа таһааран, кэрэ аҥаардарга тыыннаах сибэкки дьөрбөтүн уонна сыаналаах подарок биэртэлээтэ. Ол кэннэ 2019 сыл түмүгүнэн кыайыылаах отчуттарга, сылгыһыттарга грамота, бириэмийэ туттарда. Биэчэри эҕэрдэ концерынан түмүктээтибит. Үлэ-хайҕал, Үлэ-чиэс, Үлэ-албан аат, Үлэ-өлбөт сүппэт үтүө аат!